HITZAK, BERBAK

Hizkuntza, edozein ama hizkuntza, umetako emozio, bizipen eta  usainetan daukagu errotua, estuki lotua gure izaerarekin.  Amaren hitz gozoak, aittitteren hitz bereziak eta exotikoak batzutan, amonaren esaera zaharrak eta kondairak, … dena gure imajinarioan, ametsen elikagai eta lehen pentsamenduak gauzatzeko materia, gure nahiak eta beharrak adierazteko tresna.

Hitzen musika eta doinuak talde jakin bateko identifikatzen gaituzte, herri inguru bateko.

Aldi berean, hizkuntza erlazionatzeko bitartekoa da, beste batzuekin harremana, loturak finkatzeko zubia. Hizkuntza jakin batean “sintonizatzen” dugunean besteren batekin, arrotz sentituko gara beste hizkuntza batean arituz gero. Hitzen bitartez mundua ikusteko era partekatzen dugu. Eta hizkuntza hori ikastea, ezagutzen ez zuenari mundu horretako ateak irekiko dizkio, dimentsio berri batean murgilduz. Hitzak, berbak, eta hauen erabilerak, adimenaren sakoneko egitura erakusten dute, oinarrian dauden sineskerak eta baloreak.

Eta erne euskaldun zahartzat jotzen dugunok geure burua. Euskaraz jaio izana ez da nahikoa babes, nahikoa berme.

Denborarekin konturatu naiz hizkuntza bera, egiten gaituen beste edozein elementu bizi bezalaxe, garatu, aldatu, higatu, alperrik galdu eta  hondatu egin daitekela. Eta berarekin batera besteekin eta beraien munduarekin konektatzeko kodea .

Gure gorputza eta oreka zaintzen dugun bezala, gure hizkuntza ere landu, trebatu eta elikatu beharko dugu, benetan tresna aberatsa dela sentitu ahal izateko, edozein egoera eta eremutan erabilgarria. Inguru domestiko-sozialetik aratago, arlo profesionalean zehaztasunez aritzeko modukoa.

Hitzak, berbak, izaera gorpuzten duten hari ikustezinak bailitzan egiten dute beraien dantza, mundu izkutuen giltz eta Herrien altxor preziatuen zaindari.

Ama, ume, eme, maite, bizi, lagun, ekin, galdu, alper, neke, samin, mingots, gozo, epel, ur, lur, hor, hemen, bihotz, entzun, ekin, egin, zuk, nik…

Aurkene Redondo, Enbor kontsultoreak-Urune Hotelako zuzendaria