URTE BERRIA

Egunak joan, egunak etorri … eta konturatu orduko 2013. urtean sartu gara eta urte berriari ongi etorria ematean konturatzen gara nola pasatzen diren urteak, eta bizi gogoa pizten da. 

Esan beharrik ez dago, gainera, garai hauetan izaten dela promesa gehien egiten den sasoia, batez ere, norberaren buruari egindakoak: osasunari begira, itxurari, familiari tartea eskaintzeari … denetarikoak entzun izan ditugu denok, ziur aski.

Promes egite hau, urte bukaeran egindako balantzearen ondorio ere izan daiteke. Atzera begiratu eta urte osoan zehar bizitakoa gainbegiratzen dugu, poztasunaz askotan, tristuraz batzuetan eta gehiago egin daitekeenaren sentsazioaz besteetan. Horra hor gauzak aldatzeko beharraren promesa!

Baina nire zalantza hurrengoa da: noiz arte gogoratzen gara egin dugun promesa "finko" horretaz? Egun batzuk, asteak, hilabeteren bat agian… askoz gehiago ez, udaberria heldu orduko beste buru hauste batzuk izaten baititugu buruan. Ez al da ba errazagoa izango urte osoko promesak ahaztu eta egunerokotasunean zentratzea? Egunerokotasunean izaten dugun jarrera hori aldatzea? Bizitzaren aurrean jarrera positiboa izatea? helburuak ezarri, epe laburreko urratsak zehaztu eta lorpenen jarraipena egin aldiro. Xedea buruan argi izan beharra dago eskuartetik ihes ez egiteko.

Itxura batean hain beldurgarri bihurtu duten 2013. urte honi aurre egiteko beharko dugu zerbait eta zer hoberik jarrera positiboa geureganatzea baino; bizitzari begi berriekin begiratu eta urteari aurre egiteko: lanean, familiartea, lagun artean,… Urteak gauza on asko baititu gorderik guretzako baina horiek ikusteko gai izan behar gara, bestela, nor ohartu aukera ondotik pasatzen den momentuan?

Ondorioz, ongi etorria izan dadila urte berria. Oparotasunez beterikoa izango baita, baina oparotasun horiek ikusteko gaitasuna norberak izan behar du bere barnean.

Izaro Bideguren